ਕੁਲ ਹਿੰਦ ਕਿਸਾਨ ਸਭਾ,ਕੁਲ ਹਿੰਦ ਖੇਤ ਮਜਦੂਰ ਯੂਨੀਅਨ ਅਤੇ ਆਂਗਣਵਾੜੀ ਮੁਲਾਜ਼ਮ ਯੂਨੀਅਨ (ਸੀਟੂ) ਵਲੋਂ ਸਾਂਝੇ ਤੌਰ

ਮੁਕੇਰੀਆਂ ,1 ਮਈ ,ਡੀਡੀ ਨਿਊਜ਼ਪੇਪਰ।
ਕੁਲ ਹਿੰਦ ਕਿਸਾਨ ਸਭਾ,ਕੁਲ ਹਿੰਦ ਖੇਤ ਮਜਦੂਰ ਯੂਨੀਅਨ ਅਤੇ ਆਂਗਣਵਾੜੀ ਮੁਲਾਜ਼ਮ ਯੂਨੀਅਨ (ਸੀਟੂ) ਵਲੋਂ ਸਾਂਝੇ ਤੌਰ ਤੇ ਸਥਾਨਕ ਬੀ ਡੀ ਪੀ ਓ ਦਫਤਰ ਸਾਹਮਣੇ ਮਜਦੂਰ ਦਿਵਸ ਦੇ ਮੌਕੇ ਤੇ ਨਿੱਜੀਕਰਨ, ਉਦਾਰੀਕਰਨ ਅਤੇ ਕਾਰਪੋਰੇਟ ਪੱਖੀ ਸੰਸਾਰੀਕਰਨ ਅਤੇ ਵਧ ਰਹੀ ਨਾਬਰਾਬਰੀ , ਭ੍ਰਿਸ਼ਟਾਚਾਰ, ਫਿਰਕਾਪ੍ਰਸਤੀ ਵਿਰੁੱਧ ਸਮਝੌਤਾ ਰਹਿਤ ਸੰਘਰਸ਼ ਲਗਾਤਾਰ ਜਾਰੀ ਰੱਖਣ ਦਾ ਫੈਸਲਾ ਕੀਤਾ ਗਿਆ। ਐਕਸ਼ਨ ਦੀ ਅਗਵਾਈ ਸੁਰੇਸ਼ ਚਨੌਰ, ਰਘਬੀਰ ਸਿੰਘ ਪੰਡੋਰੀ, ਜੋਗਿੰਦਰ ਕੌਰ ਮੁਕੇਰੀਆਂ ਨੇ ਕੀਤੀ, ਜਿਸ ਵਿਚ ਸਭਾ ਦੇ ਸੂਬਾ ਪੈ੍ਸ ਸਕੱਤਰ ਆਸ਼ਾ ਨੰਦ ਨੇ ਵੀ ਸ਼ਿਰਕਤ ਕੀਤੀ। ਇਸ ਮੌਕੇ ਜ਼ਬਰਦਸਤ ਪ੍ਰਦਰਸ਼ਨ ਕਰਦਿਆਂ ਕੇਂਦਰ ਸਰਕਾਰ, ਪੰਜਾਬ ਸਰਕਾਰ ਅਤੇ ਪੰਚਾਇਤ ਵਿਭਾਗ ਖ਼ਿਲਾਫ਼ ਜੰਮ ਕੇ ਨਾਅਰੇਬਾਜ਼ੀ ਕੀਤੀ ਗਈ।
ਆਪਣੇ ਸੰਬੋਧਨ ਵਿੱਚ ਬੁਲਾਰਿਆਂ ਨੇ ਕਿਹਾ ਕਿ ਮਈ ਦਿਵਸ ਕਾਰਪੋਰੇਟਾਂ ਦੇ ਅੱਤਿਆਚਾਰ ਖ਼ਿਲਾਫ਼ ਮਜਦੂਰ ਜਮਾਤ ਦੇ ਜੇਤੂ ਸੰਘਰਸ਼ ਦਾ ਪ੍ਰਤੀਕ ਹੈ। ਉਨ੍ਹਾਂ ਆਖਿਆ ਕਿ ਜੋ ਹੱਕ ਮਜਦੂਰ ਜਮਾਤ ਨੇ ਅੱਜ ਤੱਕ ਲਹੂ ਵੀਟਵੇਂ ਸੰਘਰਸ਼ ਰਾਹੀਂ ਪ੍ਰਾਪਤ ਕੀਤੇ ਹਨ, ਮੋਦੀ ਸਰਕਾਰ ਸਭ ਤੋਂ ਵੱਧ ਤੇਜ਼ੀ ਨਾਲ ਉਨ੍ਹਾਂ ਨੂੰ ਕਾਰਪੋਰੇਟਾਂ ਦੇ ਹੱਕ ਵਿੱਚ ਤਬਦੀਲ ਕਰਨ ਲਈ ਪੱਬਾਂ ਭਾਰ ਹੋਈ ਪਈ ਹੈ। ਉਨ੍ਹਾਂ ਆਖਿਆ ਕਿ ਸਰਕਾਰੀ ਅਦਾਰਿਆਂ ਦਾ ਨਿੱਜੀਕਰਨ, ਵਿਦੇਸ਼ੀ ਬਹੁਕੌਮੀ ਕਾਰਪੋਰੇਸ਼ਨਾਂ ਨੂੰ ਬਿਨਾਂ ਟੈਕਸ ਵਪਾਰ ਦੀ ਖੁਲ੍ਹ ਦੇਣ, ਕਾਰਪੋਰੇਟ ਪੱਖੀ ਸੰਸਾਰੀਕਰਨ, ਕੰਮ ਦਿਹਾੜੀ 8 ਤੋਂ 12 ਘੰਟੇ ਕਰਨ, ਕਿਸਾਨਾਂ ਦੀਆਂ ਜ਼ਮੀਨਾਂ ਖੋਹ ਕੇ ਕਾਰਪੋਰੇਟਾਂ ਨੂੰ ਦੇਣ, ਐਮ ਐਸ ਪੀ ਨਾ ਦੇਣ, ਅਗਨੀਵੀਰ ਯੋਜਨਾ ਲਾਗੂ ਕਰਨ, ਸਸਤੀ ਲੇਬਰ ਪੈਦਾ ਕਰਨ ਲਈ ਬੇਰੁਜ਼ਗਾਰੀ ਚ ਵਾਧਾ ਕਰਨ, ਕਾਰਪੋਰੇਟ ਦੇ ਕਰਜ਼ੇ ਮੁਆਫ਼ ਕਰਨ ਅਤੇ ਬਾਕੀ ਜਨਤਾ ਦੇ ਨਾ ਕਰਨ, ਕਹਿਣੀ ਦੇ ਉਲਟ ਕੰਮ ਕਰਨ, ਆਂਗਣਵਾੜੀ ਕਾਮਿਆਂ ਨੂੰ ਪੱਕੇ ਨਾ ਕਰਨਅਤੇ ਇਹ ਸਭ ਕਰਨ ਲਈ ਤਾਨਾਸ਼ਾਹੀ ਕਾਇਮ ਕਰਨ ਵਾਲੇ ਕਾਰਨਾਮੇ ਉਸਦੀ ਇਸੇ ਮਨਸ਼ਾ ਦਾ ਹਿੱਸਾ ਹੈ ‌। ਉਨ੍ਹਾਂ ਆਖਿਆ ਕਿ ਆਰ ਐਸ ਐਸ, ਭਾਜਪਾ ਦੀ ਅਗਵਾਈ ਵਾਲੀ ਕੇਂਦਰ ਸਰਕਾਰ 2047 ਤੱਕ ਭਾਰਤ ਨੂੰ ਮਹਾਂਸ਼ਕਤੀ ਬਣਾਉਣ ਦੀ ਗਰੰਟੀ ਦੇ ਰਹੀ ਹੈ, ਪ੍ਰੰਤੂ ਉਸ ਤੋਂ ਨੋਟਬੰਦੀ ਵੇਲੇ ਕਢਵਾਏ ਕਾਲੇ ਧਨ ਦੇ 15- 15 ਲੱਖ ਦੀ, 2022 ਤੱਕ ਕਿਸਾਨਾਂ ਦੀ ਆਮਦਨ ਦੁਗਣੀ ਕਰਨ, ਹਰ ਸਾਲ 2 ਕਰੋੜ ਰੁਜ਼ਗਾਰ ਦੇ ਣ ਅਤੇ ਹੋਰ ਫਲਾਪ ਗਰੰਟੀਆਂ ਦਾ ਹਿਸਾਬ ਮੰਗ ਕੇ ਪੁੱਛਿਆ ਜਾਵੇ ਕਿ ਹੁਣ ਦੀਆਂ ਗਰੰਟੀਆਂ ਦੀ ਕੀ ਗਰੰਟੀ ਹੈ। ਉਨ੍ਹਾਂ ਆਖਿਆ ਕਿ ਭਾਜਪਾ ਵਾਲੇ ਬੀਫ ਕੰਪਨੀਆਂ ਤੋਂ 250 ਕਰੋੜ ਦਾ ਚੰਦਾ ਲੈ ਆਏ। ਦੂਜਿਆਂ ਨੂੰ ਕੁਰਪਟ ਕਹਿਣ ਵਾਲੇ ਇਲੈਕਟ੍ਰੋਲ ਬਾਂਡ ਦੇ ਘੁਟਾਲੇ ਦੇ ਹੀਰੋ ਹਨ।ਦੂਜੀ ਪਾਰਟੀ ਦੇ ਨੇਤਾ ਨੂੰ ਕੁਰਪਸ਼ਨ ਦਾ ਡਰਾਵਾ ਦੇ ਕੇ ਆਪਣੀ ਪਾਰਟੀ ਚ ਸ਼ਾਮਲ ਕਰਕੇ ਕਲੀਨ ਚਿੱਟ ਦੇ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਇਮਾਨਦਾਰੀ ਦਾ ਬੁਰਕਾ ਪਾ ਕੇ ਸੱਤਾ ਵਿਚ ਆਈ ਆਮ ਆਦਮੀ ਪਾਰਟੀ ਵੀ ਕੁਰਪਸ਼ਨ ਨੂੰ ਬੜਾਵਾ ਦੇ ਰਹੀ ਹੈ। ਅਤੇ ਬੀ ਜੇ ਪੀ ਵਾਲੇ ਰਾਹ ਚਲ ਰਹੀ ਹੈ।ਉਨ੍ਹਾਂ ਆਖਿਆ ਕਿ ਜੇਕਰ ਜਨਤਾ ਨੇ ਆਪਣੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਦੀ ਭਲਾਈ ਦੇਖਣੀ ਹੈ ਤਾਂ ਲੋਕ ਸਭਾ ਚੋਣਾਂ ਵਿੱਚ ਭਾਜਪਾ ਨੂੰ ਹਰਾਉਣ ਲਈ ਸਭ ਗਿਲੇ ਸ਼ਿਕਵੇ ਛੱਡ ਕੇ ਉਸ ਵਿਰੁੱਧ ਵੋਟ ਦੀ ਵਰਤੋਂ ਕਰਨੀ ਚਾਹੀਦੀ ਹੈ, ਤਾਂ ਜ਼ੋ ਮਜ਼ਦੂਰਾਂ, ਕਿਸਾਨਾਂ ਅਤੇ ਹੋਰ ਮਿਹਨਤੀ ਲੋਕਾਂ ਦੇ ਹਿੱਤਾਂ ਦੀ ਰਾਖੀ ਕੀਤੀ ਜਾ ਸਕੇ। ਉਨ੍ਹਾਂ ਆਖਿਆ ਕਿ ਉਪਰੋਕਤ ਮੁਦਿਆਂ ਅਤੇ ਪੰਚਾਇਤ ਵਿਭਾਗ ਦੀ ਕੁਰਪਸ਼ਨ ਵਿਰੁੱਧ ਸੰਘਰਸ਼ ਜਾਰੀ ਰਹੇਗਾ, ਭਾਵੇਂ ਕਿ ਲੋਕ ਸਭਾ ਚੋਣਾਂ ਵਿੱਚ ਚੋਣ ਪ੍ਰਚਾਰ ਲਈ ਲੱਗੀਆਂ ਡਿਊਟੀਆਂ ਕਰਕੇ ਇਸ ਨੂੰ ਕੁਝ ਸਮੇਂ ਲਈ ਪੋਸਟਪੋਨ ਕੀਤਾ ਗਿਆ ਹੈ।
ਇਸ ਮੌਕੇ ਯਸ਼ਪਾਲ ਚਨੌਰ, ਰਜਿੰਦਰ ਸਨਿਆਲ , ਜਸਵੰਤ ਸਿੰਘ ਛੰਨੀ, ਸੁਰਜੀਤ ਸਿੰਘ ਛੰਨੀ, ਭੁਪਿੰਦਰ ਸਿੰਘ, ਵਿਜੇ ਸਿੰਘ ਪੋਤਾ, ਬੋਧ ਰਾਜ, ਰਕੇਸ਼ ਕੁਮਾਰ, ਸੋਨੂੰ ਮੋਬਾਇਲ , ਜਸਪਾਲ ਚੰਦ ,ਰਘਬੀਰ ਗਿੱਲ, ਬਲਵਿੰਦਰ ਸਿੰਘ, ਪ੍ਰੀਕਸਿਤ ਸਿੰਘ, ਮਨੋਹਰ ਲਾਲ, ਯਸ਼ਪਾਲ ਸਿੰਘ ਪੰਡੋਰੀ, ਦੀਵਾਨ ਚੰਦ, ਬਲਦੇਵ ਰਾਜ ਚੱਕ ਭਾਈਆਂ, ਰਾਮ ਸਿੰਘ, ਸੁਖਦੇਵ ਰਾਜ,ਰਵੀ ਕੁਮਾਰ , ਸੁਭਮ ਮਿਨਹਾਸ, ਨਿਰਮਲ ਸਿੰਘ, ਕੇਸ਼ਵ, ਵਿਸ਼ਾਲ, ਨਰਿੰਦਰ ਸਿੰਘ, ਗੁਰਦੀਪ ਸਿੰਘ, ਉਂਕਾਰ ਸਿੰਘ, ਮਨਜੀਤ ਸਿੰਘ ਤੋਂ ਇਲਾਵਾ ਵੱਡੀ ਗਿਣਤੀ ਲੋਕ ਹਾਜ਼ਰ ਸਨ।