ਚੰਡੀਗੜ੍ਹ-ਮਨਾਲੀ: ਕੀਰਤਪੁਰ-ਨੇਰਚੌਕ-ਮਨਾਲੀ ਫੋਰਲੇਨ ਦਾ ਕੰਮ ਅੰਤਿਮ ਪੜਾਅ ਉਤੇ…

ਹਿਮਾਚਲ ਪ੍ਰਦੇਸ਼ ਵਿਚ ਚੰਡੀਗੜ੍ਹ ਤੋਂ ਮਨਾਲੀ ਤੱਕ ਦਾ ਸਫਰ ਸੁਹਾਵਣਾ ਹੋਣ ਵਾਲਾ ਹੈ। ਹੁਣ ਕੀਰਤਪੁਰ-ਨੇਰਚੌਕ-ਮਨਾਲੀ ਫੋਰਲੇਨ (Kiratpur-Nerchowk-Manali Fourlane) ਉਤੇ ਵਾਹਨ 100 ਦੀ ਰਫ਼ਤਾਰ ਨਾਲ ਦੌੜਦੇ ਨਜ਼ਰ ਆਉਣਗੇ।

ਇਸ ਫੋਰਲੇਨ ਦੀ ਉਸਾਰੀ ਦਾ ਕੰਮ ਅੰਤਿਮ ਪੜਾਅ ਉਤੇ ਹੈ। 95 ਫੀਸਦੀ ਤੱਕ ਕੰਮ ਪੂਰਾ ਹੋ ਚੁੱਕਾ ਹੈ। ਕੁਝ ਹੀ ਦਿਨਾਂ ਬਾਅਦ ਇਸ ਫੋਰਲੇਨ ਨੂੰ ਆਮ ਲੋਕਾਂ ਲਈ ਖੋਲ੍ਹ ਦਿੱਤਾ ਜਾਵੇਗਾ। ਹਿਮਾਚਲ ਸਰਕਾਰ ਨੇ ਵੀ ਹਾਲ ਹੀ ਵਿਚ ਕੇਂਦਰੀ ਸੜਕ ਨਿਰਮਾਣ ਮੰਤਰਾਲੇ ਨੂੰ ਪੱਤਰ ਲਿਖਿਆ ਸੀ ਅਤੇ ਨਿਤਿਨ ਗਡਕਰੀ ਜਾਂ ਪੀਐਮ ਮੋਦੀ ਨੂੰ ਚਾਰ ਮਾਰਗੀ ਦਾ ਉਦਘਾਟਨ ਕਰਨ ਲਈ ਪੱਤਰ ਲਿਖਿਆ ਸੀ। ਪਹਿਲੇ ਪੜਾਅ ਵਿੱਚ ਸਿਰਫ਼ ਕੀਰਤਪੁਰ ਤੋਂ ਨੇਰਚੌਕ ਤੱਕ ਦਾ ਰਸਤਾ ਖੋਲ੍ਹਿਆ ਜਾਵੇਗਾ।

ਜਾਣਕਾਰੀ ਅਨੁਸਾਰ ਕੀਰਤਪੁਰ-ਨੇਰਚੌਕ-ਮਨਾਲੀ ਚਾਰ ਮਾਰਗੀ ਬਣਨ ਤੋਂ ਬਾਅਦ ਹੁਣ ਚੰਡੀਗੜ੍ਹ ਤੋਂ ਮਨਾਲੀ ਦੀ ਦੂਰੀ 47 ਕਿਲੋਮੀਟਰ ਘੱਟ ਜਾਵੇਗੀ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਲਗਭਗ ਤਿੰਨ ਘੰਟੇ ਸਮੇਂ ਦੀ ਬਚਤ ਹੋਵੇਗੀ ਅਤੇ ਦਿੱਲੀ ਤੋਂ ਮਨਾਲੀ ਦਾ ਸਫਰ 12 ਦੀ ਬਜਾਏ ਸਿਰਫ 9 ਘੰਟੇ ਦਾ ਹੋਵੇਗਾ।

ਇਸ ਦੇ ਨਾਲ ਹੀ ਪਹਿਲਾਂ ਚੰਡੀਗੜ੍ਹ ਤੋਂ ਮਨਾਲੀ ਲਈ 9 ਘੰਟੇ ਦਾ ਸਮਾਂ ਲੱਗਦਾ ਸੀ, ਹੁਣ ਸਿਰਫ 6 ਘੰਟੇ ਦਾ ਸਮਾਂ ਲੱਗੇਗਾ। ਦੱਸ ਦਈਏ ਕਿ ਕੀਰਤਪੁਰ ਤੋਂ ਮਨਾਲੀ ਦੀ ਦੂਰੀ 237 ਕਿਲੋਮੀਟਰ ਹੈ। ਹਾਲਾਂਕਿ, ਕੀਰਤਪੁਰ-ਨੇਰਚੌਕ-ਮਨਾਲੀ ਚਾਰ ਮਾਰਗੀ ਨੂੰ ਪੂਰਾ ਕਰਨ ਲਈ ਜੂਨ 2024 ਤੱਕ ਦਾ ਸਮਾਂ ਲੱਗੇਗਾ। ਪਰ ਇਸ ਦੇ ਕੁਝ ਹਿੱਸੇ ਅਗਲੇ ਮਹੀਨੇ ਜੂਨ ਵਿੱਚ ਖੋਲ੍ਹੇ ਜਾਣਗੇ।